Malay Rusu Sanches: BIOGRAFIA KERI LARAN SABALAE

BIOGRAFIA KERI LARAN SABALAE

Diposting oleh Malay Rusu Sanches | Label: Biografia

Saudozu Pedro Nunes alias “Keri Laran Sabalae” moris iha Irlafai iha loron 22 Outubru 1955, oan hosi Lucas Nunes no Felicidade Nunes. Maun alin hamutuk nain ualu, hosi sira ne’e mak Duarte Nunes (Aktual Vice Prezidenti Parlamentu Nasionál), Vitor Nunes, Madalena Nunes, Amelio Nunes no Elsa Nunes. Sabalae hahú nia eskola iha Colegio Dom Bosco Fuiloro iha tempu Portugues no hasai Quarta Clase iha 1969.

Iha 1971, oan mane hosi Lucas Nunes no Felicidade Nunes hasai formasaun monitór eskolár iha Dili, iha 1972 nia hanorin eskola ensinu báziku iha Leuro to’o 1975. Iha fulan Outubru 1975, eis-profesor ne’e kaben kulturál ho nia noiva, Rojentina Bernardino hosi Aldeia Assalaino.

Bainhira Indonézia invade Timor-Leste, mane foun Assalaino ne’e halai ba ailaran hamutuk ho nia família tomak Txaikery Sakalo hosi parte Norte Lospalos assume kargu sekretáriu suku iha área Puamoko-Apa to’o Ira-Malaru iha tinan 1975-1976. Iha fatin ne’e rasik, Pedro Nunes sarani nia an ho naran kódigu funu “Txaikery Ilimoko”.

Iha tinan 1976, Bainhira inimugu harahun Sakalo, Txaikery halai ho nia kaben ba Tutuala ho nia família durante semana tolu no nia kaben hetan abortu tanba kondisaun ailaran la permite. Liu tiha ne’e, laen ba Rojentina hetan ordem hosi Komandu Rejionál no nia diside haketak malu ho nia kaben no nia família destaka ba Belta 3 iha Iliomar hamutuk ho Komisáriu Polítiku, Juvinal Inacio alias ”Sera Key”.

Iha tempu ne’eba hamósu dezentendimentu parte Sakalo ho Komandu Rejionál Belta 3, ne’e duni “Sabalae” hamutuk ho responsavél sira polítiku parte Sakalo inklui Orlando So, Dinis Gandara, Vitor Gandara, Julio Alegria no responsavél sira seluk hetan kapturasaun no deteña iha fahiluan durante durante semana rua. Liuhosi investigasaun klean, sira inosente no ikus mai Komandu Rejionál husik sira, liu semana ida de’it, “Sabalae ” hetan fi’ar hosi Komandu Rejionál nomeia nia sai asistente Seleru eh lojístika ne’ebé servisu hamutuk ho Abel Larisina iha área Iliomar.

Bainhira Belta 3 nakfera iha 1976, Txaikery ho nia kompañeiru sira destaka ba Vikeke besik matebian hodi konsentra iha ne’eba to’o 1977. Momentu ne’eba FALINTIL halo restaurasaun administrativa, Sub-Rejiaun hotu, Talisma, Luar no Bivaque, Cernacs, Celulas no Nukleos.

Bainhira matebian rahun iha 22 Setembru 1978, Txaiekery/Sabalae hamutuk ho nia kompañeiru sira destaka mai fali iha Lospalos liuhosi Lorehe hamutuk ho Komandante Maunana, Frederico da Costa alias Bere Malai Laka, Maukusu, Kucomoko no Albino Morato, hafoin sira hasoru malu ho Adjuntu Kay Rala Xanana Gusmão ne’ebé nu’udar membru Komite Sentrál Fretilin (CCF) no responsavél polítiku, Adjuntu Txai, membru CCF iha Achataraleu Mehara.

Iha tempu ne’e mak halo estratéjika funu gerilla durante loron tolu halo reuniaun ho diresaun setór sira, asionár gerilla iha Ponta Leste, adezaun tátika populasaun hasoru inimigu, grosu diresaun no forsa ba sentru sira.

Sabalae asume tanba kargu hanesan sekretáriu ba reuniaun ida ne’e foti menuta ba planu estratéjiku nian. Iha ne’e mak halo projesaun kompania 017 ba Ponta Leste ne’ebé lidera hosi Komandante Mautei, Segundu Komandante Latuasa, Segundu Komandante setór Kilik hanesan Xefe Militar Gerilla nian.

Iha 1979-1984, Txaikery/Sabalae hetan nomeasaun hosi komandu luta nu’udar asistente polítika ba departamantu informasaun, ajitasaun no propaganda ne’ebé lidera hosi Bere Malai Laka no mós asistente pesoál ba Adjuntu Kay Rala Xanana Gusmão iha Sakalo hamutuk ho Adelino Freitas nu’udar Sekretáriu Zona Monteiru, Julio Fereira Holy Natxa, Julio Alegria, Gonsal Nunes alias Keris, Afonso Cabral no Benedito Dias Quintas alias Punu Fanu.

Iha tinan hanesan, bainhira halo análiza subjetiva iha Sakalo ne’ebé lidera hosi Adjuntu Kay Rala Xanana Gusmão iha Sevai hetan asaltu hosi inimigu tanba hetan traisaun hosi Teotonio.

Inimigu konsege tiru mate ema nain tolu inklui Martinho da Costa no dokumentu barak konsege hadaun no rede klandestina balun iha vila laran sai nakdoko no tropa Indonézia atu oho sira nai rua, liu tiha tinan ida inimigu tiru mate Vitor Nunes iha ailaran, iha Sevai parte Norte Lospalos.

Ho akontesimentu ne’e, Adjuntu Kay Rala Xanana Gusmão ho nia grupu tenke halai no destaka ba Iliomar inklui Txaikery hodi forma delegasaun atu akompaña situasaun sentru fronterias katak rezisténsia sei eziste ka la’e. No mós halo lokalizasaun kompanias Freas, Tiga Nol Lima no grupu sira seluk.

Iha 3 Marsu 1981, bainhira reorganizasaun nasionál ba kriasaun Partidu Marxista Lenista FRETILIN, iha Maubae entre Laline ho Lakluta, Txaikery Ilimoco hanesan membru komisaun organizadora prinsipál ba konferénsia ida ne’e no sai sekretáriu prinsipál hodi foti minuta no mós nomeiadu hanesan Xefe Departamentu Informasaun, Ajitasaun no Propaganda hamutuk ho Konselleiru Militar Bere Malai Laka, Asistente Matos Lemorai no Benedito Rodrigues.

Iha konferénsia ne’e mak halo formasaun ba segunda jerasaun Komite Sentrál Fretilin ho membru nain ualu mak Renaldo Correia Freitas alias Kilik Wae Gae sai membru CCF no Xefe Estadu Maiór FALINTIL, Dinis de Carvalho alias Nelu Kadomi Timor sai membru CCF no Sub-Xefe Estadu Maiór FALINTIL, Saki Nere sai membru CCF no Komisáriu Polítiku no Sekretáriu Rejiaun Nakroman, Adelino Freitas alias Hari Nere sai membru CCF no Sekretáriu ba Sekretariadu CCF no Adjuntu ba Komisáriu Polítiku Nasionál, Tito da Costa alias Lere Anan Timur sai membru CCF no Komisáriu Polítiku kolokadu iha brigada vermella no ikus mak Frederico alias Bere Malai Laka sai membru CCF no Sekretáriu Biro Informasaun, Ajitasaun no Propaganda.

Kay Rala Xanana Gusmão eleitu nu’udar Komisáriu Polítiku Nasionál no Komandante Xefe ba FALINTIL nian.

Hahú hosi ne’e, Txaikery sempre hamutuk ho komandante supreme FALINTIL nu’udar asistente polítiku, sekretáriu pesoál Xanana Gusmão sobre planu estratéjiku funu no xefe departamentu informasaun, Ajitasaun no Propaganda ne’ebé hetan orientasaun direitamente hosi komandu luta Kay Rala Xanana Gusmão.

Iha vila laran tropa Indonézia destera Txaikery nia família ba Atauro iha tinan 1981-1982. Tanba inimigu rona katak Txaikery mate iha Aitana durante operasaun Kikis. No nia alin Amelio Nunes inimigu ka’er no dadus iha Lospalos.

Iha 1982, komandate Kay Rala Xanana Gusmão hasoru malu ho Bispu Dom Martinho da Costa Lopes iha Mehara ho objetivu Re-estabelesimentu ligasaun esteriór ne’ebé interompe dezde adezaun emisora nasionál iha 1977.

Iha 8 Agusto hahú inisia levantamentu armada ne’ebé akontese iha Mehara, Laleno, Leuro no Kraras, Txaikery parte mós ba planu estratéjiku ne’e.

Iha 1984 Comando da luta orienta ba delegasaun FRETILIN hodi forma konverjénsia nasionálista iha Portugal hamósu Uniaun Demokratika Timor-Leste (UDT), FRETILIN no Igreja Timor hodi hatudu ba komunidade internasionál sobre polítika nasionál iha ailaran.

Iha momentu ne’eba, bolu re-estruturasaun radikál iha sentru rejiaun military sentrál nakroman. Ho ida ne’e, Txaikery simu kna’ar foun hanesan Komisáriu Polítiku ba Informasaun, Ajitasaun no Propaganda no mós sai sekretáriu Rejiaun Ponta Leste. Kompañeiru sira hetan nomeasaun sai Komisáriu Polítiku hanesan Nino Konis Santana, Lu-Olo, Falur Rate Laek, Mauvelis, Vivake no seluk tan.

Hosi 1984-1986, Txaikery hamutuk ho nia kompañeiru sira iha sentru Rejiaun Militar Sentrál Nakroman to’o inimigu tiru no ka’er nia iha 28 Novembru 1987.

Militar Indonézia lori nia mai iha Lospalos Wira Husada hodi fo tratamentu. Iha ne’eba mak nia hasoru malu ho Alfredo Rodrigues alias Horizon Comoro Lao Rai Funu ne’ebé hetan tiru nia ain tohar no Adjuntu Fernando alias Hokara.

Liu tiha fulan ida, militar Indonézia muda nia ho Comoro ba Kopasus Nangala sira iha tasi ibun. Iha ne’eba mak Kopasus sira halo interogasaun ba nia loroloron durante fulan ida sobre nia ligasaun ho rede klandestina no mós apoiu ne’ebé fo ba FALINTIL iha ailaran maibé nia laloke ibun to’o inimigu tortura nia no hatama bé tanke laran. Comoro hahu buka kilat atu tiru malu ho Kopasus maibé la konsege. “Husik ami naben hotu iha komarka laran” Comoro dehan.

Liu ida ne’e, Kopasus sira muda fali Txaikery ho Alfredo ba SGI iha Comoro no Txaikery hela nafatin iha Colmera.

Iha tempu ne’e mak Puto Oan Kiak Funu ba vizita hodi entrega karta hosi David Alex Daitula nian, liu fulan tolu, Txaikery ho Alfredo , Kopasus muda sira ba dadur iha Flamboyan Baucau durante tinan ida.

Maske iha dadur laran maibé Txaikery ho Daitula iha ligasaun nafatin tanba membru team sira balun mós servisu iha rede klandestina ne’ebé fasilita sira nia servisu iha dadur laran.

Iha 1990, militar Indonézia husik nia ho Alfredo sai hosi dadur, Alferdo fila mai Lospalos no Txaikery fila fali ba Dili hodi hela hamutuk ho nia maun Duarte Nunes iha Vila-Verde no hetan suporta hosi nia maun, Txaikery loke kios ida sai fatin atividade rede klandestina tanba ligasaun metin kedas dezde iha ailaran.

Iha tinan hanesan, Txaikery hetan ligasaun ho Komandante Kay Rala Xanana Gusmao. Depois ida ne’e mak nia naran Txaikery Ilimoko muda ba “Keri Laran Sabalae”.

Iha fulan Abril 1990, Sabalae hasoru malu ho Kay Rala Xanana Guamão iha Ponta Leste iha Pai-Oto, Bauro hafoin ba Sakalo no Paicau. Ekipa ne’e kompostu hosi Acacio Bernardino alias moris, Inacio Bernardino alias Adik, Alvarico da Costa alias Doben Hadomi Timor,Americo no Putu Oan hamutuk ho ekipa ida hanesan Antonio Campus, Arlindo da COnceição, Gil da Cruz no seluk tan. Liu semana rua inimigu komesa hatene ona tanba maluk balun entrega foto ba kopasus bainhira Sabalae ho sira seluk hasoru malu o Komandante Kay Rala Xanana Gusmão iha Enfermeiru Matias Goveia nia uma iha Kuluhun-Dili.

Dezde ne’e, Sabalae komesa subar maibé servisu nafatin ho nia kompañeiru sira iha atividade klandestina, iha tempu hanesan, komandante Kay Rala Xanana Gusmão husu Sabalae atu re-estrutura klandestina sai efetivu no efikas liu iha vila laran ho objetivu luta pátria povu maubere bele ativu direitamente tanba rede klandestina ne’ebé lidera hosi Constancio Pinto alias Terus, Jose Manueal Fernandesalias Nakfilak, Donanciano Gomes alias Matak kuaze persegidu hotu no labele halo atividade klandestina ho di’ak.

Bainhira 12 Novembru 1999 akontese, Constancio Pinto alias Terus, Donancio alias Klamar Fuik subar no halai ba liur no Jose Manuel Fernandes alias Nakfilak inimigu ka’er hamutuk ho Mau-Hudu Ran Kadalak iha Dili iha Janeiru 1992. Iha Komite Frente Klandestina ida ne’e membru barak make ma ka’er hanesan Jacinto Alves, Gregorio Saldanha, Filomeno Alves, Francisco Branco no Juvencio Martins ne’ebé hetan dadus hosi inimigu sira.

Liu tiha fulan hirak nia laran, Komandande Kay Rala Xanana Gusmão inimigu ka’er iha 20 Novembru 1992 iha lahane.

Povu barak dezanima ho kapturasaun ida ne’e no joven barak mak husu ba Sabalae kona-ba luta tanba komandante ka’er ona maibé nia dehan ba sira nune’e , “Ema ida labele muda destinu povu maubere nian ba ukun rasik-an tanba objetivu ba libertasaun kauza komum no fiar metin nafatin ba komandante maske nia iha dadur laran.”

Ho ran manas, Sabalae hateten ba joven sira iha abrigu (Subar fatin) “Ita tenke hakerek ita nia istória rasik ho ran no ruin ba ukun rasik-an tanba ita nia terus no mate mak sei determina destinu libertasuan povu maubere hosi nakukun laran.”

Liu tiha fulan lima inimigu ka’er Mauhunu Bulerek Karataiano iha Abril 1993, iha Ainaro, Sabalae simu mós pergunta hanesan hosi rede klandestina no hatan nune’e, A luta Continua nia signifikadu saida? Ne’e katak mate ka rende ita tenke assume nia kargu hodi luta libertasaun nasionál, ne’e duni lalika hakfodak bainhira lider ida mai rende ka mate tanba loron ida ema ida de’it mak dada bandeira mós ira sei hetan ita nia ukun rasi-an.

Nino Konis Santan assume kargu Xefe Konsellu Rezisténsia iha 1993, Sabalae nomeadu hosi Komandu Luta sai Sekretáriu Ezekutivu Frente Klandestina ho nia Vise David Dias Ximenes ho Adjuntu sira hanesan Rubin Loke Dalan, Paulo Assis, Funu Matak, Virgilio Smith no seluk tan.

Ho Sekretáriu Ezekutivu Frente Klandestina Sabalae forma orgaun diretiva rejionál ORDIR ne’ebé responsabiliza iha rejiaun tolu mak Rejiaun Leste, Paulo Assis mak ka’er , Rejiaun Sentru, Paulo Alves alias Tubir Loke Dalan no Kompañeiru ka’er rejiaun Oeste, Aquilino Fraga alias Ete-Uco.

Iha nivél Sub-Distritu forma Komite Ezekutivu Zona, Cezo no kria nukleu rezisténsia populár, Nureps iha nivél suku no estabelese selula komunidade iha nivél aldeia (CELCOM).

Bainhira forma ORDIR, komite Ezekutivu Zona, Nukleu Rezisténsia Populár, Celula Komunidade, povu barak ativu iha rede klandestina tanba re-estruturasaun la’o efetivu no FALINTIL hetan apoiu makas no informasaun ba rai liur kona-bá situasaun rai laran mós la’o di’ak maibé loron aban nia ita la hatene.

Iha 28 Juñu 1995, Sabalae ho nia kompañeiru Remigio Tilman (Metan) lakon Bainhira halo vizita servisu ba Xefe Konsellu Nino Konis Santana no ikus mai lakon iha loron 29 Juñu 1995 no to’o agora ita lahatene nia paradeiru iha ne’ebé.

Família sira ne’ebé subar Sabalae to’o nia lakon mak Alfredo da Conceição alias Superman ho nia família hosi Kuluhun, Ines Araujo lai alias Mae Faluk ne’ebé reprezenta hosi João de Araujo alais Hakilar nain hosi Kuluhun, Rosa Cabral aliasBiayanti ho nia família hosi Becora, Tia Rita hosi Lahane, Mana Virginia, Luisa no Florindo hosi Kuluhun, Família Zias hosi Mota ulun Becora, Felismina Araujo ho nia família hosi Becora, Família Araujo ho nia família hosi Becora, família João hosi Tali laran Becora, Alex hosi Audian no família Eduardo Tilman hosi Audian no seluk tan.

Bibliografia

Tatoli Agensia noticiosa de Timor Leste, “Keri Laran Sabae” Nia Istória Luta, Publika iha loron Tersa-Feira, 06-07-2017, asesu husi http://www.tatoli.tl/2017/07/keri-laran-sabalae-nia-istoria-luta/, asesu iha loron Sexta-Feira, 01-09-2017.

Arquivo & Muzeum Resistencia Timorense, "Frente Clandestina Fotografia Keri Laran Sabalae", asesu husi http://amrtimor.org/docs/index.php?tempo=1308851539&criterio_1=Resist%EAncia+Timor-Leste&criterio_2=Fotografias&criterio_3=02.+Frente+Clandestina&tab=Fotografias, asesu iha loron Sexta-Feira, 01-09-2017.